Saturday 20 October 2012

PARTE VII : 20 Agosto loron Falintil Se maka fundador Falintil?

Caetano Guterres Maulory
 eis tropas husi DSM

 16.g).Reunioens sekretas entre koordenadores ho komandante
Geral das Forças Armadas da Defesa do Povo Maubere
Rogerio Lobato

Reuniaun para koordenasaun ho komandante Rogerio hala’o sekretamente ho koordenadores sira desde  11 de Agosto, ne’e halao ketak ketak para labele halo malae sira deskonfia. Kada kompanhia aprezenta evolusaun ikus liu iha kompanhia ida idak nia laran, no situasaun sobre avanso forças UDT nian. Kada companhia ida nia laran eis tropas nain hira maka simpatisa ba UDT, oin sa kada kampanha hala’o sira nia servisu atu detekta iha kompanhia ida idak nia laran hodi deskobre ema sira ne’ebe simpatiza ba FRETILIN no ema sira ne’ebe simpatiza ba  UDT. I ida ne’e mos tenke halo tentativa dala barak para ita bele hatene loloos. Ida ne’e mos ami tenke usa tatika  oioin i fera ulun para nia resultado ne’e loloos, para labele dezarma arbiru deit wainhira to’o ona oras atu halo operasaun kontra golpe nian etc.(Hakerek badak deit, resumido).

16.h).Iha hanoin balun atu forma Junta Militar ou governo ida husi militar sira de’it ho sistema ditadura militar

Iha kompanhia DSM nia laran depois de hala’o reuniaun interno kompanhia nian. komandante João Branco hakarak atu konvense komandante ROGERIO LOBATO atu forma de’it Junta Militar ida depois de hala’o tiha kontra golpe. Ate ke komandante João Branco iha tiha ona governo de junta militar  de sombra ida. Komandante João Branco dehan nune’e “Ita bele forma governo husi ema militar de’it, do ke entrega governo ba FRETILIN, alternativu seluk, ita bele forma  Junta militar provisório ida, depois ita hare ba situasaun, terceiro ita hare possiblidades atu komesa ho sistema ditadura militar depois maka sei la’o neineik ba sistema demokracia nian.” 

Entaun hakerek nain maka responde ba nia katak la aceita, ho razaun katak iha militar nia laran ema matenek uituan deit, ne’e duni tuir hakerek nain nia hanoin ami so bele forma junta militar provisório ida, até ke Comite Central da Fretilin to’o fali iha Dili. Maibe forma governo ida ho sistema ditadura militar ne’e ami la aceita ida, tan ba povo Timor ne’e terus teb tebes ona iha ditadura ida nia okos. Momento ne’eba ami koalia malu manas tiha uituan maibe depois hot hotu la’o diak fila fali. Iha momento ne’eba ami mos la hatene se membros CCF sira mate hira, moris hira, iha nebe ami seidauk hatene ida, depois de CCF fila ona ba Dili maka governo sei entrega fali ba FRETILIN ne’e plano fo foun. 

Hakerek nain apresenta tan razaun selu seluk, ne’ebe ikus mai komandante João Branco mos aceita. Entaun hakerek nain oferece voluntariamente atu ba buka infomasaun sobre paradeiro lideres FRETILIN nia. Iha momento ne’eba ami militar sira bele sai ba pasiar mas tenke hatais farda militar i labele lori kilat. etc. etc. (Hakerek badak deit, resumido).

17. SORUMUTU HO KAY RALA XANANA GUSMAO

17.a).  Ho preokupasaun boot, tan ba iha ona ideias ne’ebe klaru teb tebes husi DSM atu hakarak konvense komandante Rogerio Lobato atu harii governo militarista, maka  Hakerek nain ba lalais iha sede CCF nian, iha Santa Cruz, iha avo Xavier nia uma, ho intensaun atu karik hetan ema ruma ne’ebe bele fo informasaun sobre paradeiro membros CCF nian, atu tenta kontaktu ho sira, nune membros Comite Central Fretilin nian (CCF) prepara aan atu bele kaer governo bainhira Forças Armadas da Defesa do Povo Maubere, dezarma tiha ona UDT sira. Tan ba iha kompanhia DSM nia laran, iha ona planu balun ne’ebe hakarak atu konvense futuru komandante Rogerio Lobato, atu harii governo militar ida ou selae junta militar provisoriu ida molok membros CCF sira fila fali mai iha Dili. 

Ideia ida ne’e, hakerek nain tauk no preokupa teb tebes tan ba dala barak ideia ne’ebe forma junta militar provisoriu ne’e, karik tebes duni maka bele susar atu husik fali, tan ba  wainhira kaer ona governo ida ita bele sente ona gosto i ambisaun atu ukun, sai riku no boot bele domina ema ida nia espirito, ne’e buat natural ida, i entaun ambisaun sira ne’e bele obriga ami militar sira lakohi tan entrega governo ba Fretilin. Tan ba ho preokupasaun ida ne’e maka hakerek nain la konkorda ho ideia ida atu forma governo militar ne’e, i husu ba maluk selu seluk atu hare lai ba situasaun membros CCF sira nian, tan ba hakerek nain mos hatene katak atu ukun nasaun ida la’os facil i iha momento ne’eba matenek sira iha vida militar ema uituan de’it ke ita bele konta ho ita nia lima fuan, tan ba ne’e duni maka hakerek nain halai lalais ba iha sede CCF nian iha Santa Cruz.

17.b).Hakerek nain la’o ho laran tarido los, molok tama iha odamatan hakerek nain hare deit maun boot Xanana mes mesak maka tuur iha ne’eba, laiha tan ema seluk. Ha’u haku’ak nia, maun boot tanis ho nervoso ha’u mos tanis tan ba hanoin maun bo’ot mesak deit. Ha’u husu ho lia fuan nune’e: “Maun agora oin sa?” ha’u nia intensaun atu husu ba maun bo’ot Xanana katak ami ne’e prontu ona atu dezarma UDT maibe governo ne’e halo oin sa?"

Maibe ho laran taridu no nakdedar, liafuan ne’e sai deskontrolado tiha, tan ba hau nia pergunta tama sala tiha, entaun maun bo’ot Xanana hatan ba hau nune’e “Imi maka tropas tiha be o husu fali ba ha’u oin sa, se imi lakohi halo buat ruma, entaun o lori kilat ida mai, hau sei funu mes mesak hasoru UDT sira, depois de ha’u mate tiha ona, maka UDT bele ukun rai Timor ba, h’au mos la intersse ona tan ba ha’u mos mate tiha ona.Hakerek nain dada iis naruk rona maun Xanana nia lia hirak ne’e, tuir mai maun bo’ot Xanana foo hanoin ba hakerek nain katak eis tropas sira tenke forma forças armadas  libertasaun nacional ida ne’ebe urgent atu bele halo kontra golpe ida. 

I nia dehan tan katak tenke prepara ho hanoin ne’ebe diak no fundamento iha demokrasia, tenkeser ho disciplina ne’ebe aas teb tebes, para labele viola direitus umanus ou oho, tiru ema arbiru de’it wanhira hala’o ona kontra golpe.  I maun bo’ot Xanana husu para molok kontra golpe hala’o tenke esplika uluk disciplina sira ne’e ba militar sira, wainhira avansa ona ba iha sira nia pozisaun sira.  “Labele foo tempo para UDT sira domina kompanhia hotu iha Dili laran, konsentra no mobiliza ema timor laran tomak hodi kaer kilat, se imi la halo lalais kontra golpe  maka UDT nia forsa sei sai rihun ba rihun i imi sei susar atu hasoru sira, “maun Xanana dehan tan” etc..

17.c). Ikus liu maun boot Xanana hatete ba hakerek nain katak fatin nebe oras nee membros CCF sira subar ba ne’e la do’ok ida i atu mai Dili  kestaun horas 2 ga horas 3 lao ain deit, nee duni Xanana  dehan katak wainhira ami halu ona kontra golpe, la kleur deit membros de CCF mos too ona iha Dili, hakerek nain promete atu fila fali ba sede CCF, atu fo evolusaun sobre preparasaun kontra golpe nia no mos ho intensaun atu lori kilat diak ida ba maun Xanana, tamba wainhira hakerek nain hasoru nia, hare katak maun Xanana iha deit kilat oan ida hanesan fali sete  sete ou karik kilat tiru manu nia ida, hakerek nain ladun repara didiak tamba ho ansi deit no kalan hahi mos ladun naroman, entaun hakerek nain laran kontente i fila kedas ba DSM.

17.d). Wainhira hakerek nain hasoru malu ho maun bo’ot Xanana iha sede CCF nian, hakerek nain la informa ba Xanana katak maluk balun iha intensaun atu forma governo militar ida. Hakerek nain fila ba DSM ho laran kontente tan ba iha konfiansa boot katak dezarma tiha UDT FRETILIN maka sei kaer governo. Entaun hakerek nain la’o lalais ba diresaun kompanhia DSM nia no foo hatene lalais ba maluk sira seluk liu liu ba komandante João Branco katak la precisa ona forma junta militar provisoriu ida, wainhira dezarma ona forsa operasional UDT nia, tan ba tuir orientasaun maun bo’ot Xanana katak wainhira halo kontra golpe ona i dezarma ona UDT, liu oras 2 ou oras 3 de’it membro CCF sira sei to’o ona iha Dili, “ maibe iha buat ida maka halo hakerek nain hanoin la hotu no admira teb tebes, wainhira lao tuir dalan fila ba iha kompanhia DSM, maka kona ba Xanana ninia espirito determinasaun no aten brani. Oin sa ema hotu halai ba subar maibe nia la halai. Nia tuba rai metin nafatin iha sede CCF nian, maske nia hatene nanis katak UDT sira sei mai kaer nia i bele oho nia, tan ba nia hakerek artigo barak kontra UDT, liu liu nia POESIA sira ne’ebe doko espiritu nasionalismo juventude sira, liu liu eis tropas sira makas liu. 

Xanana nia POEMA sira ne’e halo manas ema nia laran atu prontu halo funu ida ba nia libertasaun. Maibe Xanana la taok i hela mes mesak iha sede Fretilin nian wainhira hakerek nain ba hasoru nia. Xanana nia POESIA sira ne’e maka foo estimulu maka’as mos ba hakerek nain sai hanesan militante FRETILIN nian, dada hanesan maninga ida hodi la tauk, hodi kreia kondisoeins para harii organizasaun klandestinaI ida iha kompanhia nia laran hodi foo apoio ba FRETILIN hanesan ko’alia ona iha ponto No.1 to’o iha ponto No.13, iha leten ba,h odi hari forcas armadas ida” espirito de determinasaun ida ne’e maka halo hakerek nain adimira teb tebes kona ba maun bo’ot Xanana Gusmão. Nia hatudu duni hori uluk kedas, nune’e mos iha resitencia Timor nia tomak, hosi base ikus liu iha Foho Matebian nakfera to’o timor manan, etc.(Hakerek badak deit, resumido).

No comments: