Thursday 20 January 2011

UNPOL TAKA ODAMATAN HUSIK AGUSTINHO EMA BAKU MATE, KUARTEL PPU MALAYSIA HETAN ATAKES

Tempo Semanal Breaking News
Dili, 18/01/2011

Mais ou Menus tuku sanolu resin walu liu minutu lima nolu resin lima familia vitima ne'ebe hetaan atakes no baku mate iha dalan bo'ot komoro besik PPU Malaysia, ninia familias lori mate isin ho konvoi atu ba maliana. Iha ambulansia ne'ebe tula mate isin Agustinho Viegas Barreto akompania mos bis haat nakonu ho joventude sira. To'o iha fatin ne'ebe Agusto hetaan atakes ba ne'e kareta ne'ebe lori mate isin halai liu maibe bis jovens husi bis haat ne'e haksoit tun hodi halo atakes ba kualtel UNPOL/PPU Malaysia ninia iha sorin karuk husi ponte Komoro.

Jovens sira halo atakes tama too kuartel laran halo Membru UNPOL sira ne'e halai rungu ranga no balun halai la ho roupa iha isin lolon. "UN pulnag sudah karena tidak bisa membantu rakyat Timor Leste," hakilar jovens sira maka hirus hela ne'e.

Atakes no invazaun ba kuartel PPU Malaysia ne'e para hafoin hetan atuasaun husi PNTL Task Forse. Tuir Observasaun jornal ne'e jovens sira halai sai husi PPU ninia knuk hafoin hetan atuasaun husi PNTL Task Forse ho GNR.

"Ami hirus sira tan ba matebian ne'e depois hetan atakes no baku husi ema nain haat iha tiga roda ne'ebe faan besik dalan boot ne'e ho ulun kanek, halai mai husu aijuda ba UNPOL sira iha ne'e maibe sira lakohi aijuda nia i hetook aat liu tan seguransa UNPOL sira ne'e taka fali portaun ba nia hodi husik ema na'in haat ne'e mai rasta nia ba baku mate iha estrada bo'ot ne'eba," dehan joven ida mane ida ne'ebe espresa hela ninia hirus ba UNPOL ne'e.

PPU Malaysia hetan konvite husi Governu Timor Leste iha 2006 mai aijuda hapara violensia no tulun Governu hametin hikas lei ho ordem ne'e ninia membru barak maka trauma ohin kalan nune'e sira nia kuartel ninia portaun haleu fali ho arame parapadu no depois masa sai tiha kilat tarutu dala ida iha kuartel ne'e ninia laran.

Eis Petisionariu Agustinho Viegas Barreto hetan sona mate husi grupu jovens ida besik kuartel UNPOL/PPU Malaysia ho Akademia ninia oin mais ou menus tuku ida madruguada 18/01 ne'e fumenta protesta no asaltu kontra UNPOL husi Malaysia iha komoro besik Ministeiru Agrikultura ohin kalan.

Tuir fontes Jornal dehan parte PNTL investiga hela kazu ne'e no deskonfia maka'as suspeitu nain haat ne'ebe involve iha oho eis segundu sarjentu F-FDTL maka iha 2006 hola parte iha petisionariu ne'e oho husi ema na'in haat.
"Tuir informasaun preliminariu hatudu katak kazu ne'e mosu tan ba odiu malu kleur. Ami deskovre katak vitima foin fila husi Kruz jovens iha tasi tolu. Depois to'o iha Akademia nia ohin iha dalan sorin fali iha tiga roda ida faan iha ne'eba no ema na'in haat hemu hela. Vitima hakat ba atu sosa bee maka nia baku malu ho ema nain haat ne'e depois nia koko halai ba diresaun odamatan boot PPU malaysia ninian maka malae sira la aijuda i nune'e ema nain haat ne'e ba rasta mai hodi besi kanu ba tan iha ninia ulun no sona iha ninia kapas hodi hamate nia," esplika membru PNTL ne'ebe husu jornal ne'e atu labele publika ninia identidade.

Fonte ne'e haktuir. "katak iha indikasaun balun maibe ami sei investiga hela nafatin tan ba ne'e hau labele foo liu tan detalhu." (TS).

No comments: