Saturday 1 January 2011

Loron Paz Mundial Ema Kapital TL Hamahan An Iha Tasi no Lafa'ek Mosu iha area Branka

Tempo Semanal-Dili, 01.01.2010
Iha kapital dili hakmatek tebes iha loron uluk fulan janeiru ninian. Hahu dader kareta nakonu ho ema no motor nadodon ba diresaun tasi liu husi dalan bidau santa ana, tasi tolu no fatu ahi.
Ate kareta governu ninian balun mos nakonu ho kadeira no emar nadodon tesik tasi ibun. Hanesan por izemplu kareta toyata kotuk mamuk sira hanesan toyota nisan 02-049G, Toyota 00-645G, Toyota 02-947G, Toyota 00-267G no sei barak iha loron toleransia de pontu ne’e ba hotu halo sira nia kna’ar iha tasi ibun.
Iha dalan sira, besik tasi ninin ninian, iha patroliamentu PNTL no seguransa sivil maibe sira ignora de’it. Seguransa sivil tahan fali maka karosa roda tolu ne’ebe para sala tan ba iha ema balun maka para atu sosa bee.
Iha tasi ibun husi Kristu Rei ninia kotuk, Kristu rei ninian, rai henek mutin, bidau santa ana, bidau lecidere tama too bairo dos kokerus, tasi tolu no tibar kuase rai henek nakfilak tiha ba ema no kareta mos motor para fatin araska.
Uma oan sira ne’ebe harii husi Governu iha tasi ibun rai henek mutin okupa tomak husi vizitante sira no kmanek liu tan iha restaurant Timor Top toka muzika ho volume nakonu halo ema sira iha rai henek leten doko aan tuir laloran ninia baku.
Iha loron Paz Mundial ninian ne’e labarik sira hariis mos halimar bola iha tasi laran hodi foo tempu ba inan ho aman sira tuur iha tasi ninin hodi tesi lia. Maibe teki-tekir labarik sira ne’ebe tuur besik tasi ninin, kruzamentu dalan sa’e ba uma prezidenti da Republika ninian hakilar dehan, “lafa’ek…lafa’ek…..”
Lafa’ek ida mosu iha besik ai parapa okos tasi laran dalan atu tama ba area brank aka kristu rei ninian hodi halo ema lubun boot maka ba haree. “Iha lafa’ek mutin ida maka iha ne’eba ne’ene…ooo ne’eba ne’ene….maun haree husi ai sana ho ai hun ne’e ninia klaran. Mutin loos ne’e,” dehan mane ida ne’ebe kous hela ninia oan feto ida iha sorin kuana no oan mane iha sorin seluk.
Nia hatutan, “ema dehan ne’e lafa’ek ne’ebe mala’e sira husik ne’e.”
Kuaze Sidade Dili hanesan lakon ninia atrabalasaun husi trafiku no ema. Atividade bisnis mate total soke iha mak karosa roda tolu ho roda rua maka pasiar besik dalan sira iha area tasi ninin area branka no fatin seluk ninian.
Ema balun komprimenta malu, kaer liman, hakuak malu ho oin midar iha loron Paz Mundial ninian hodi haluha problemas no susar husi tinan tuan ninian.
“Helooo boas festa kolega,” dehan klosan ida hela besik komarka Bekora ninia sorin ba mota benamauk nia diresaun.
Ninia maluk mos simu ho oin kontente hodi dehan, “Feliz ano novu no sucesu ba ita hotu.”
Iha besik oras atu husik hela tinan tuan no ain sorin hakat daudaun ba tinan foun mosu grupu ida maka baku malu tan ba prezebiu iha area refere. (TS)

No comments: