Saturday 16 October 2010

Ministeiru edukasaun foo Bolsu de estuda ba Membru F-FDTL no PNTL

Iha semana ne’e Ministeiru Eduksaun foo bolsu de estudu ba membru FALINTIL-Forca de Defeza Timor Leste (F-FDTL) hamutuk na’in sanulu no Membru Polisia Nasional Timor Leste (PNTL) na’in lima hodi ba eskola iha Filipina. Tenente ida husi F-FDTL sei ba hasai kursu mestradu iha manajemen no na’in sia sira seluk sei ba hasai lisenciatura kona area pilotu aviaun, tekniku no enjinaria.
Husi Parte PNTL ninian membru sira ne’e na’in rua sei ba foti mos kursu pilotu no sira seluk sei tuir kursu lisenciatura ba kriminolojia ninian. Marka iha ceremonia ne’e Ministru Edukasaun Joao Freitas, Vice Ministru Edukasaun ho Kolonel F-FDTL Falur Rate la’ek.
Eis Gerrileiru Falur Rate la’ek ezije ba membru Forca Defeza no Seguranca sira ne’e atu uza didiak fiar ne’ebe governu ho Estadu Timor Leste foo ba sira no tane nafatin Timor Leste ninia naran iha Filipina. “Ita bo’ot sira ba iha ne’eba atu eskola. Maibe labele haluha katak ita iha kultura proprio, ita iha valor no Relijiaun rasik. Tan ba ne’e tenke labele halo monu nasaun ninian naran,” apela Falur.
Falur Ezije ba kandidatus sira ne’e katak labele hamoe Estadu ho povu Timor Leste nia naran iha Filipina nune’e duni husu atu membru husi instituisaun estadu TL nian rua ne’e atu labele hatudu hahalok la di’ak iha nasaun Tagalog ne’eba maibe presiza estuda didiak. Tuir planu estudante sira ne’e iha oportunidade atu estuda durante tinan lima tenke remata ona.
Iha celebrasaun aniversariu Falintil iha tinan ida ne'e Komandante Jeneral F-FDTL, Major Jenaral Taur Matan Ruak informa prioridade Dezenvolviomentu F-FDTL ba Tempo Semanal katak, “prioridade primeiru lugar liu ba nasaun ne’e maka Rekursus Umanus.” Tuir eis Xefe Estadu Maior Rezistencia Armada ne’e katak presiza atu prepara ema simu fali tongkat lideranca iha instituisaun F-FDTL ninian laran.

No comments: