Friday 3 September 2010

Xanana Dehan Mario Carrascalao Beikten No Beiten Hatudu Krize de Konfianca Mosu Ona Iha Governu AMP

Durante de konsultasaun Planu Estratejiku Dezenvolvimentu Nasional iha sub distritu Verza Cruz hodi kalan, ne'ebe hala'o iha Eis Merkadu Municipal, Dili, PM Xanana apertamenta hatudu momoos lakon tiha ona ninia konfianca ba Vice Primeiru Ministru Asuntu Administrasaun jestaun do Estadu, Ir. Mario Viegas Carrascalao. Deklarasaun funu aperta entre PM ho ninia vice ne'e mosu hodi hataan ba perguntas mai husi joven ida ne'ebe kestiona kona ba osan Milaun Tolu lakon iha Ministeiru Financas. "Ema ida ne'ebe ko'alia kona ba Milaun Tolu lakon iha Finansas, ema ne'e beik ten i la hatene sistema. Ha'u hatene se Enj. Mario Carrascalao hakarak hatudu. Nia dehan doit la monu ba rai maka lori buat ida dehan trez miloeins. Ne'e hatudu de'it nia beik ten, la hatene sistema," Xanana hateten ho lian maka'as. Antes ida ne'e iha momentu balun kotuk Vice PM Mario Carrascalao kondena liu husi Media katak osan milaun tolu lakon iha Ministeiru Financas nune'e PM no ninia parte investiga hela.
PM kontinua dehan, "ha'u hatene Sr. Mario maka kostume loke bu'at ida ne'e. Mas ha'u dehan ba ita bo'ot sira hotu, Enj. Mario habosok nia aan rasik."
Primeiru Ministru ne'e rekuinese hanesan ema dala balun halo sala mas loro-loron hakilar-hakilar hanesan ema ida sai santo i ema hotu maka aat, "ida ne'e ha'u la aseita.
Durante periodu rezistencia iha fulan Agusto 1987 eis komandante em Xefe das Falintil ne'e, iha  ninia surat loron 20 fulan Agusto 1987 dehan Enj. Mario Carrascalao hanesan Governador Provinsia Timor-Timur momentu ne'eba hanesan "Propangador ba Indoneisa ninian," no hodi kalan Xanana so'e viadas ba ninia vice dehan, "ita dala ruma haluha tiha katak, uluk ita la'o haleu Timor dehan Kemerdekaaan adalah mimpi di siang bolong. ohin mai hakilar fali ha'u, ne'e ha'u la simu."
Eis Lider CNRM ne'e bolu atensaun ba eis Governador iha rezime Soeharto ninian. "Ha'u la aceita ema balun ne'ebe uluk manan osan barak ho ita nia raan, ohin hakilar ha'u,"Xanana Trata Mario Carrascalaoiha publiku.
Vice PM ne'e ninia fungsaun balun suspende ona ho lei ne'ebe aprova iha 25/08/2010 no promulgadu ona husi Prezidenti da republika DR. Jose Ramos Horta.
Atu hatene klean liu tan Tempo Semanal sei tenta atu hetan deklarasaun ruma husi Vice PM ninia parte maibe too agora ami seidauk tan Vice PM rasik la iha ninia gabinete no ninia fungsionariu husi parte media ninia la atende telefone.
Tuir Observador Politika no social, Filipe Rodrigues Pereira ne'ebe foin mak finaliza ninia mastradu iha Indonesia tuir intervista exkluxivu ho Tempo Semanal dehan,"Dahuluk hau hakarak dehan katak tristeza bo'ot ba ita asiste governasaun aktual ne'e tamba estrutura governu leno ba publiku hanesan fali governu ne'e fika disorganizadu ka disorientadu. Mosu disentendimentu hanesan ne'e lolos sira buka solusiona internalmente tuir etika politka aliansa nian atu nune'e publiku bele tau konfiansa diak nafatin ba governasaun ne'e. Maibe buat nebe mak akontese durante ne'e hatudu estrura governu gosta liu uza imprensa hodi ataka-malu. Ataka-malu liu husi imprensa estruturamente hatudu governu la solidu hodi hala'o ninia funsaun, governu la solidu maka sei fo'o impaktu ba funsionamentus governasaun nian no ikus povu mak terus tamba governasaun la'o ho kudeik- a'an.
"Disintedimentu ne'e hatudu momos krizi de konfiansa husi lideransa maximu AMP nian ba VPM Mario Carrascalao. No suspensaun de poder ba Mario Carrascalao signifika VPM Carrasacalao hetan sanksaun administrativu ba ninia lalaok no hahalok balun mak la tuir politika AMP nian. Maibe sei furak liu no atu la hamosu impresaun oi-oin maka suspensaun de poder hanesan fo’o dadaun ba VPM Carrascalao presiza fo’o mos ba membros governu nebe’e mak durante ne’e hala’o k’nar servisu la los ka la tuir politika AMP nian." dehan Filipe.
Nia hatutan katak, "Kestaun konaba saida mak VPM, Mario Carrascalao tenki halo relasiona ho suspensaun de poder, hanesan hau hateten ona iha leten katak legal no moralmente presiza konsidera katak suspensaun nudar sanksaun. Sanksaun ba staff ida nudar buat bai-bain, maibe sanksaun ba ema ida ho kargu VPM maka ninia signifikasaun bele oi-oin, hanesan falta ka la’iha konfiansa tan ona, husu atu voluntariamente resigna a’an no sel-seluk tan. Tamba ne’e, karik VPM Carrascalao sei iha ninia dignidade maka dalan diak liu ba nia mak resigna ninia a'an husi estrutura governu ida  ne'e, atu nune'e bele fo'o oportunidade ba governu ne'e ukun iha kondisaun ne'ebe solidu nia laran. Hau hanoin povu baruk mak injoa ona ho konflitus no polemika nebe’e sempre mosu iha governu aliansa ne’e nia laran. VPM Carrascalao bele fila ba fali PN hodi taumatan-lesuk ba governasaun AMP tuir buat nebe mak antes ne'e nia halo."
"Sobre kondenasaun nebe dehan katak Eng. Carrascalao halo mos KKN durante nia ka'er kargu nudar VPM diak liu entrega ba instituisaun legal atu investiga no hot-hotu hein rezultadu investigasaun nian.
Maibe konflitus nebe agora dadaun mosu entre PM Vs VPM Carrascalao inderectu bele harahun liutan Eng. Carrascaloa ninia pessoal no iha ao mesmu tempu bele harahun mos instituisaun PSD nudar partidu iha eleisaun 2012 nebe sei mai," Observador ne'e sublina. **end**

2 comments:

Anonymous said...

Hau durante ne suporta PM. Xanana ho nia komponente sira.,
mais ho liafuan ida nebe mak hasai hosi PM. Xanana katak Bosokten no Beikten nebe hatudu ba Ex.VPM Mario, ne sala bo'ot.
nudar ema bot nunka mais atu hasai liafuan hanesan ne iha publico nia oin, seda mak rai seluk sei hateten ba ita governo?
kuidado liu hasai liafuan antes ita nia nanal sei lakon senti.

Anonymous said...

"Xanana dehan Mario Carrascalao beikten no bosokten".

Nudar maubere oan hakarak fo deit hanoin ida ba Sr. Maun boot XANANA katak atu eduka ami maubere oan no jerasaun maubere oan sira labele hatudu hahalok ida nebe mak lamerese atu halo.

maun boot ! hau atu dehan deit katak, nudar lider nasaun RDTL nian halo favor hakarak atu koalia karik koalia tuir ETIKA laos koalia hanesan fali ema nunka eskola.

maun boot ! favor ida hakarak eduka ita nia jerasaun foun laos ho atetude hanesan laiha ETIKA.

maun boot ! los duni Sr. Mario uluk tempo Indonesia nudar Governador, maibe keta haluha ohin loron matenek iha Timor mos barak ba dadaun ona, ida ne'e mai husi se nia politika ? keta haluha iha 1983 maun boot ho Sr. Mario koalia saida iha larigutu (Kontak Dame) ? keta haluha, 1988 semak brani halo politika iha Jeneral Soeharto nia kadeira okos no ikus mai Timor-Timur terbuka ba Mundo Internasional hodi nune'e jornalista sira tama mai hodi hare povo timor nia terus no bele hasoru malu maun boot iha ai-laran no lori maun boot nia documentus sira ba rai liur ! buat sira ne'e ita labele nega.

maun boot ! hau hanoin Sr. Mario ne'e pelemenus sei halo netik buat ruma ! agora oinsa konaba maun boot nia ema sira nebe mak hanaran aan nudar "MAFIA MELBOURNE" ? liu-liu mak Sra. Emilia PIRES ho Sr. Agio PEREIRA, durante okupasaun Indonesia iha Timor sira halo saida ba rai ida ne'e ? apakah durante neba sira han toba iha Australia nemak maun boot konsidera fali sira nudar funu nain ? ida ne'e maun boot halo ERRU boot, lori rai rahun soe ba povo maubere nia matan laran !

maun boot ! hakarak hatene iha 2006 kuando krizi mosu Sra. EMILIA PIRES hakarak uja tempo ida que defisil liu ba povo ida ne'e, lori Timor atu Integra ho Australia, iha tan buat ida que aat liu mak Sra. EMILIA PIRES attaka Sr. Jeneral Taur Matan Ruak mak agora dadaun trasa hela Plano para atu halo KUDETA hasoru maun boot. kuidadu maun boot hau hare "MAFIA MELBOURNE" sira komesa soran ona maun boot ho Jeneral Taur Matan Ruak para atu sobu malu i depois sira aproveita situasaun ida ne'e para lori Timor ba Integrasaun ho AUSTRALIA.

maun boot ! kuidadu ho "MAFIA MELBOURNE", sira komesa trasa plano makas ona atu dudu ses tiha Timor kidun metan sira ba foho leten atu nune'e sira bele bolu sira nia maluk Australiano sira mai okupa ita nia rain.

Maun boot ! ikus liu mak ne'e, ami fo hanoin ba maun boot katak labele hatudu liman fuan ida ba ema antes ita hare uluk ita nia aan prefeito ona k lae ? hau ne'e hanesan SANTO sira k lae ? nemak los maun boot ! se lae loron ida povo ai-leba oan ida mak sei koalia ba maun boot katak maun boot mak BOSOKTEN no BEIKTEN LAHATENE SISTEMA......!!!!!