Wednesday 15 September 2010

PSD Deside Nafatin Iha AMP Nia Mahon Mário Carrascalão Fila Ba Deputadu


Dili, Tempo Semanál Hafoin de Enj. Mário Viegas Carrascalão rezigna husi ninia kargu hanesan Vice Primeiru Ministru ba Koordenasaun ba Asuntus Administrasaun no Jestaun do Estadu, durante loron rua partidu Sosiál Demokrata (PSD) hala'o reuniaun iha Dili hodi deside destinu AMP, PSD ohin no horisehik sei deside destinu Governu AMP, dehan membru prinsipál iha partidu ne’e.
Tuir Estudante UNTL, A. De A. Barros, ne'ebé husu atu jornál ne’e labele publika ninia naran tutun kompletu ne’e katak, iha opsaun rua ba lider sira iha PSD ninia laran katak solidáriu ho sira nia fundadór ou sira ta'uk lakon kadeira hodi atrai sira nia eis Presidente,“ tan ba ha’u haree agora sira tarik ulur.”
“Tuir ha’u nia observasaun AMP sei la monu mezmu PSD dada an tomak. Ne’e katak PSD mak lakon hetok aat liu tan kuandu sira deside sai husi AMP.
Nune’e duni saa de’it mak sira sei foti la dun fó benefísiu ba sira. Di’ak liu aproveita agora,” nia komenta kahur ho piadas.
Iha intervista eskluzivu ho Tempo Semanál (12/9) Sekretáriu Jerál Partidu PSD Marito Magno dehan sira la hala'o traisaun hasuru sira nia fundadór no informa mós katak Vice Primeiru Ministru ne'ebé husik hela ninia pozisaun hanesan Deputadu durante tinan ida fulan lima sei fila hikas ba uma fukun Timor-Leste.
Atu hatene liu tan mai ita akompaña intervista Tempo Semanál (TS) ho Sekretáriu Jerál Partidu Sosiál Demokrata, Marito Magno (MM) tuir mai ne’e.
TS: Sr. Sekretáriu Jerál karik bele esplika badak kona ba rezultadu enkontru loron rua ne’e ho relasiona ba Kazu Rezignasaun Vice Primeiru Ministru Enj. Mário Viegas Carrascalão ninian?
MM: Rezultadu enkontru Konsellu Nasionál no komisaun Polítika Nasionál iha loron rua ne’e diskute no desizaun ne'ebé ami foti kona ba rezignasaun ita nia Vice Primeiru Ministru, Enj. Mário Viegas Carrascalão katak, primeiru hanesan partidu polítiku ne'ebé iha AMP nune’e ami tetu no haree ba interese Nasionál.
Interese povu Timor-Leste nian tomak, i nune’e mós partidu PSD hola parte iha programa, iha Governu AMP. Iha programa barak mak implementa no balu la’o daudauk.
Eh.. ..hato’o ami nia solidariedade ba ami nia Vice Primeiru Ministru, Sr. Enj. Mariano no ami nia fundadór Sr. Enj. Mário ne'ebé hanesan Vice Primeiru Ministru.
Tan ba ida ne’e mak desizaun ikus ne'ebé ami foti tau interese sira ne'ebé ohin ha’u dehan PSD sei kontinua i apoiu nafatin ba iha Governu AMP to’o 2012 Eleisaun ba Parlamentu i membru do Governu.
Ami mós iha desizaun, iha Pontus sanulu (10) ida hanesan ne’e, ne'ebé ami sei hato’o diretamente ba sua Exelénsia Primeiru Ministru iha tempu badak ho karta ofisial sira ne'ebé mak ami nia diresaun partidu sei hato’o ba sua exelénsia Primeiru Ministru, kona ba kondisoins saida mak ami nia partidu sei husu sua exelénsia Primeiru Ministru.
TS: Ho desizaun ida ne'ebé ita boot sira foti horisehik hodi fó nafatin apoiu ba AMP ne’e la signifika ita boot sira nega fundadór no eis presidente?
MM: Naun..., ha’u hanoin ne’e la ida. Tan ba desizaun ne'ebé ami foti ne’e mós, desizaun ida ne'ebé ba interese Nasionál. Eh...agora nia Enjeñeiru ne'ebé hanesan mós fundadór ba Partidu, ami respeita nafatin ba nia.
I nia mós ami konvida hotu nia iha momentu enkontru ne’e, hato’o nia razoins hirak mak iha nune’e ami bele tetu no haree hodi foti desizaun ne'ebé mak merese ba ita nia rai no ita povu tomak.
Ida ne’e maka ami foti eh ami hanoin katak desizaun ne’e di'ak, la iha no la hala'o traisaun ida ba enjeñeiru tanba Sr. Enjeñeiru sei hanesan Deputadu Parlamentu Nasionál (PN) hodi asume ninia responsabilidade hanesan Deputadu PN. Parese iha tempu badak ne’e nia sei ba iha PN hanesan Deputadu ida.
TS: Entaun ne’e signifika katak Sr. Agostu Tara sei sai fali husi kadeira ne'ebé uluk nia ba substitui? Katak uluk kadeira ne’e Sr. Enjeñeiru Mário ninian mak Sr. Tara ba substitui ne’e karik Loos?
MM: Sin....depois ha’u sei haree lista ida ne’e. Ha’u hanoin ha’u sei haree Deputadu ida ne'ebé mak tenke ba troka maibé ha’u seidauk hakotu Tara ida.
TS: PSD ninia emar ida rezigna ona husi kadeira Vice Primeiru Ministru no kadeira ne’e ema balu konsidera hanesan PSD mak tenke prienxe fali. Karik bele esplika badak kona ba Pontus sanulu ne'ebé deside ona horisehik ne’e, iha pontus ruma mak PSD husu atu substitui kadeira Vice Primeiru Ministru rezignadu ho ema PSD seluk ruma?
MM: Ami la diskute kona ba kadeira ne'ebé Sr. Vice Primeiru Ministru husik hela. I ida ne’e ami fó tomak ba Sua exelénsia Primeiru Ministru karik nia mak foti desizaun atu hili Timor oan ida ne'ebé mak di’ak iha ita nia rai i nia husi partidu ne'ebé de’it.
I bele mós karik Sr. Primeiru Ministru sente katak la iha nesesidade ba pozisaun ida ne’e, ha’u hanoin Sr. Primeiru Ministru mak bele deside.
TS: Simpatizantes no apoiantes PSD balu hanesan iha Maliana dehan sira lamenta ho lia fuan Bosok teen no beik teen ne'ebé Primeiru Ministru refere ba eis Vice Primeiru Ministru Enj. Mário. Oinsá ita boot sira nia hanoin?
MM: Ha’u hanoin povu tomak hatene saa ida mak ita nia sua Exelénsia Primeiru Ministru ko’alia iha públiku maibé PSD la komenta ba ida ne’e tanba ita hotu-hotu hatene katak buat sira ne’e hotu akontese liu ona.
I tan ba lia fuan ida ne’e mak ita nia antigu Vice Primeiru Ministru hato’o ona ninia surat rezignasaun i nia rasik iha enkontru ne'ebé, nia lakohi komenta kona ba lia fuan ida ne’e.
Nia dehan, ha’u sei lakohi komenta ba lia fuan ida ne'ebé mak ita nia sua Exelénsia Primeiru Ministru ko’alia i ha’u hakarak dehan de’it katak ha’u rezigna an husi Vice Primeiru Ministru. Ida ne’e de’it.(ts)

No comments: