Thursday 10 June 2010

Surat Presidente Ramos-Horta ba Embaixador Australia nian

Dili, 08 Juñu 2010

Prezadu Embaixadór,

To’o ona iha hau nia atensaun katak AusAID iha intensaun atu ko’a nia apoiu ba projetu Merkadu  Peace Dividend Trust nian ba aprosimadamente 10% husi nível sira anteriór nian no hafoin sei hapara apoiu finanseiru ne’e tomak iha meadu tinan 2011. Ho respeitu hau husu ba Australia lá’os atu muda deit desizaun ida-ne’e, maibé mós atu ita boot aumenta no hanaruk tán finansiamentu ba projetu importante ida-ne’e no konsidera atu adota polítika ida “Timor-Leste mak Uluk” ba Australia nia programa ajudu nian ne’ebé fó preferénsia ne’ebé útil, tantu no bainhira posível, ba negósiu Timoroan nian.

Kestaun ida ne’ebé hau haklaken fila-fila ona durante dékada ida ikus ne’e nia laran, no ida ne’ebé hau sei diskute iha hau nia vizita tuirmai ba iha Canberra, mak katak maioria boot husi asisténsia doadór nian ne’ebé gasta ba Timor-Leste ne’e láos gasta iha Timor-Leste. Maibé, osan sira-ne’e gasta tiha ona ba hodi selu konsultór sira, misaun sira estudu nian, relatóriu no rekomendasaun sira.

Tan ba ho razaun ida-ne’e, hau partikularmente apoia Australia nia desizaun iha tinan 2007 atu finansia projetu Merkadu nian ne’ebé atu hatán ba problema ida-ne’e hodi diriji gastus internasionál nian ba iha ekonomia lokál – partikularmente iha parte sira ne’ebé kiak liu husi nasaun ne’e.

Projetu Merkadu nian ne’e únikamente hala’o knaar fundamentál ida iha dezenvolvimentu sektór privadu nian ne’ebé mak AusAID nia projetu sira seluk iha rai-laran la alkansa. Lahanesan ho projetu barabarak ne’ebé hetan finansiamentu husi doadór, nia prodús ona rezultadu sira ne’ebé konkretu (tanjivel), kria serbisu no prodús rendimentu impostu nian

Hanesan ne’ebé hau nota públikamente ona, Peace Dividend Trust nia serbisu muda ona maneira oinsá komunidade internasionál sira halo sira nia operasaun iha Timor-Leste. Ninia esforsu sira hodi diriji hikas no aselera ona sosa aprovizionamentu nian husi Nasoens Unida, doadór sira, no mós sektór privadu internasionál nian liuhusi treinamentu, distribuisaun tender, halo parseria (matchmaking), kampaña “Sosa iha Rai-Laran – Harii Timor-Leste”, no mós baze de dadus fa’an-nain (vendedór) nian ne’e hotu-hotu fornese servisu sira ne’ebé úniku no krítiku ne’ebé mak apoia ami nia esforsu sira hodi kria empregu no harii ekonomia ida ne’ebé viável.

Rezultadu sira husi projetu ida-ne’e nian ne’e estraordináriu, espesialmente konsidera katak nia nunka hetan finansiamentu tomak. Nia prodús ona impaktu ida ne’ebé konkretu (tanjivel) no importante duké projetu asisténsia ekonómiku seluk ruma. Nia fasilita ona negósiu Timoroan nian hamutuk 270, ajuda hodi fasilita ona kontratu 10,000 resin. Tuir estimative katak iha millaun $22 resin husi gastus internasionál nian mak diriji ona ba iha ami nia ekonoomia, kria serbisu, rendimentu taxa nian, kapasidade, no dala ruma importante liuliu, sentidu ida entre Timoroan sira katak asisténsia internasionál nian lá’os hodi selu deit konsultór rai-liur nian sira ne’ebé ho folin aas. Projetu Merkadu nian ne’e diriji ona osan millaun $20 husi negósiu nian ho deit kustu millaun $2 – ne’e nu’udár taxa reseita nian ida ne’ebé di’ak tebes.

Tan ba ho razaun sira-ne’e, projetu ne’e sai popular tebes iha nível ida nasionál no mós internasionál nian. haree ba katak konsideravelmente ladún iha folin-aas duké projetu barak seluk ne’ebé ladún iha benefísiu; no prodús rendimentu ida ne’ebé presiza duni, vizivel no mós boot ba iha investimentu. Hau nia maluk Timoroan sira ho hau haree ba projetu ida-ne’e nu’udár intervensaun doadór nian sira ne’ebé iha valór boot liu tebes entre sira seluk iha rai-laran. Tan ne’e hau la sente hakfodak bainhira mosu preokupasaun barabarak husi sektór públiku no privadu nian katak iha posibilidade ba nia atu taka, espesialmente iha distritu rurál sira. Hau mós simu ona kontaktu husi sidadaun Australianu barak ne’ebé sente preokupa ne’ebé karik planeia hela, ka iha hela prosesu, atu estabelese negósiu foun iha Timor-Leste, ne’ebé nia “susesu” depende ba ezisténsia no asisténsia husi Projetu Merkadu nian.

Tan ne’e, hau enkoraja tebes governu Australianu nian atu konsidera hikas ninia desizaun atu ko’a finansiamentu. Envezde ne’e, hau sei agradese tebes se karik AusAID bele aumenta no hanaruk ninia investimentu iha Projetu Merkadu nian ne’e hodi nune’e it abele habelar ninia benefísiu sira ba iha Timor-Leste nia laran tomak no hafoin maneja tranzisaun ida ne’eb’e ho susesu husi ninia servisu sira ba iha administrasaun públika ka sosiedade sivíl Timor-Leste nian iha tinan tolu nia laran tuirmai.

Obrigadu ba Ita Boot nia atensaun ba iha asuntu ida-ne’e. Hanesan hau nota ona iha leten, ida-ne’e nu’udár kestaun ida ne’ebé urjente no importante no hau iha hanoin atu hato’o ida-ne’e ba Primeiru Ministru Rudd bainhira hau ba vizita Australia iha fulan ida-ne’e nia laran. Hau sei husu ba nia atu gasta osan barak liután ba iha inisiativa sira hanesan Projetu Merkadu nian ne’ebé fó apoiu ba kreximentu ekonómiku ne’eb’e sustentável no kria serbisu ba Timoroan sira, enkuantu hamenus númeru husi konsultór sira asisténsia tékniku nian ne’ebé mak iha tempu barak nia laran sai ona nu’udár benefisiáriu prinsipál husi AusAID nia laran-luak ba Timor-Leste.

Ho Laran-Metin,

Dr. José Ramos-Horta

Prezidente

S.E. Sr. Peter Heyward

Embaixadór Australianu

Dili, Timor-Leste

2 comments:

Anonymous said...

Parabens Ba Sua.Ex. Presidente nia orgilho ba situasaun ekonomia Timor laran. Hau nudar hanesan Ema timor oan ida mos triste bain hira hau lee iha Face book katak AusAid koa nia orcamentu ba PDT.
Hari ekonomia iha rai laran entau ita presija hari Organisasaun hanesan PDT. e mos companya lokais sira para hodi fasilita produto lakais sira ne bele tama iha Merkadoria. Ba Presidente nia karta hau aprecia tebe tebes.
Iha asuntus seluk hau hakarak hatoo mos Timor Telcom nia operasaun besik ona Tinan sanulu ona, mais halo Ita hotu triste tamba halai liu ba Profit, hakarak halibur osan deit, maibe lakohi atu hadia buat seluk hanesan, internet, iha distritu deit mos hanesan manu moras, tuir hanu nia observasaun iha fulan maio iha distritu Aileu hau nain rasik koko katak ne labele duni atu bele prolongga nia operasaun, tamba nia performance signifika katak la diak.Karik Governu prolongga bebeik TL halao nafatin operasaun entau Timor sai izoladu a'at liu tan.Tuir resultadu estudu haun katak, Tl Governu tenke konsedera hanesan Resource advantage ida, tamba karik Governu rasik maka halao entau rende mentu sira bele tama fali ba iha caixa governu nia, e mos bele hodi selu post operasaun seluk tan. Perguntas hau nia, nusa maka governu la bele kaer/ou mudifica sai hanesan Companya ho nia estatuta Governu, hanesan iha nasau seluk seluk ( BUMN)?. Osan nebe agora iha bele usa hodi halao investimentu ba TL, ou selae, bele buka impresta osan husi nebe deit hodi halo investimentu iha are ida neba.
Iha parte seluk Ministeru Obras Public Telekomunikasaun hau deskonfia katak dala ruma mos laiha planu. Nebe ate dia data ohin loron labele halo buat ida hela deit. Kuandu atu desenvolve Nasaun ita hotu la bele liga ho politika,se ita Liga ho politika entau buat hotu2 sei la lao, ita bele liga politica desenvolvevimentu nian.
Alex.

alex_alola@google.com said...

Parabens Ba Sua.Ex. Presidente nia orgilho ba situasaun ekonomia Timor laran. Hau nudar hanesan Ema timor oan ida mos triste bain hira hau lee iha Face book katak AusAid koa nia orcamentu ba PDT.
Hari ekonomia iha rai laran entau ita presija hari Organisasaun hanesan PDT. e mos companya lokais sira para hodi fasilita produto lakais sira ne bele tama iha Merkadoria. Ba Presidente nia karta hau aprecia tebe tebes.
Iha asuntus seluk hau hakarak hatoo mos Timor Telcom nia operasaun besik ona Tinan sanulu ona, mais halo Ita hotu triste tamba halai liu ba Profit, hakarak halibur osan deit, maibe lakohi atu hadia buat seluk hanesan, internet, iha distritu deit mos hanesan manu moras, tuir hanu nia observasaun iha fulan maio iha distritu Aileu hau nain rasik koko katak ne labele duni atu bele prolongga nia operasaun, tamba nia performance signifika katak la diak.Karik Governu prolongga bebeik TL halao nafatin operasaun entau Timor sai izoladu a'at liu tan.Tuir resultadu estudu haun katak, Tl Governu tenke konsedera hanesan Resource advantage ida, tamba karik Governu rasik maka halao entau rende mentu sira bele tama fali ba iha caixa governu nia, e mos bele hodi selu post operasaun seluk tan. Perguntas hau nia, nusa maka governu la bele kaer/ou mudifica sai hanesan Companya ho nia estatuta Governu, hanesan iha nasau seluk seluk ( BUMN)?. Osan nebe agora iha bele usa hodi halao investimentu ba TL, ou selae, bele buka impresta osan husi nebe deit hodi halo investimentu iha are ida neba.
Iha parte seluk Ministeru Obras Public Telekomunikasaun hau deskonfia katak dala ruma mos laiha planu. Nebe ate dia data ohin loron labele halo buat ida hela deit. Kuandu atu desenvolve Nasaun ita hotu la bele liga ho politika,se ita Liga ho politika entau buat hotu2 sei la lao, ita bele liga politica desenvolvevimentu nian.
Alex.