Prokuradora Jeral da Republika DRA. Ana Pesoa maiske feto maibe barani tebes bainhira hala'o ninia misaun dehan Domingos da Costa Araujo komunidade ida hela besik iha besik area bebonuk. “Ha'u haree ferik ne'e simples liu fali ema seluk no dala ruma iha loron feriadu nia sai ho ninia kareta rava oan ne'e mesa-mesak deit,” Domingos dehan.
Nia hahi katak dala balun feto sira iha korajen liu atu halo servisu duke ema mane. Iha fatin barak membru Governu balun nia hela fatin sempre prezensa seguransa durate oras 24 nia laran. Hanesan mos iha uma Sekretariu Jeral Partidu Fretilin ninia uma.
Iha momentu ruma ulun boot ministeiru publiku ninian ne'e partisipa mos iha graduasaun membru PNTL husi unidade (CSP) iha centru formasaun PNTL komoro Dili. Maibe tuir observasaun Tempo Semanal ninian to'o ohin loron Sra. Ana pesoa ninia uma rasik seidauk monta seguranca ruma iha area ne'eba satan prokuradora Jeral hela iha bebonuk ne'ebe sempre mosu konflitu grupu arte marsiais sira. “Ha'u hanoin loloos Prokuradora jeral ne'e presiza liu seguranca tan ba bainhira nia prosekuta suspeitu ruma ninia seguranca bele tau en kauza,” dehan populsaun ida hela besik iha area pokuradora jeral da republika hela ba.
Tuir informasaun ne'ebe jornal ne'e halibur husi gabinete Ministeiru publiku hatudu katak Prokuradora Jeral DRA. Ana lori naha todan husi prokurador Jeral tuan ninian. Hafoin simu pose iha tinan Gabinete prokuradora Jeral ne'e halo tabela ba kazu ne'e pendentes, iha hela prosesu laran no remata. Nune'e mos iha semana ne'e pelumenus publiku bele hatene kona ba total kazu iha ministeiru publiku.
Situasaun Inkéritu pendente to’o loron-31 fulan-Janeiru, tinan-2010. Kazu pendentes ne'ebe rejistu iha prokuradoria Dili, Baukau, Suai no oekuse total 4,962 hanesan kazu pendentes, kazu ne'ebe remata ona hamutuk 420, no kazu foun ne'ebe foin tama hamutuk 301. Ho rekursus ne'ebe minim Ministeiru Publiku ne'e halo ona sira nia servisu balun maiske neineik.
Iha semana ruma liu ba Ministeiru publiku hala'o retiru iha Kon, Distritu Lautém nian. Sorumutu ida-ne’e marka prezensa husi majistradu sira hotu iha Ministériu Públiku no funsionáriu Administrasaun, Finansa no Rekursu umanu nian. Iha enkontru ne'eba sira halo tiha balansu ba atividade sira ne’ebé hala’o ona iha tinan 2009 nia laran no halo perspetiva ba tinan judisiál, ne’ebé hahú la’o daudaun ne’e.
Iha parte seluk tuir surat haklaken ba publiku Jornal ne'e asesu ba katak Adjuntu Prokuradór Jerál Repúblika, hodi Prokuradora Gerál Repúblika nia naran, hola parte iha reuniaun Konsellu Koordenasaun Ministériu Justisa nian ne’ebé haree konaba análize no aprovasaun Plano Estratéjiku ba Setór Justisa no buat hirak neébé maka sai nu’udar Prioridade Nasionál ba tinan 2010.
No comments:
Post a Comment