Wednesday 26 November 2008

Tempo Semanal Edisaun 114

Prabowo-Lere Tiru Malu Ho Bala Iha TL Iha Borobudor Ho Lia Fuan

Atu Hare video - click iha ne'e

Iha tinan meiadu mil nove centus oetenta nia laran Prabowo ho lere se kilat tutun ba malun iha area viqueque besik Bibileo wainhira Prabowo sei hanesan oficiais militar Indonesia ne’ebe komanda ninia forca hodi ba buka tuir gerileiru Falintil sira maibe hafoin de funu tinan 24 ne’ebe hamate ema oan timor rihun atus rua no depois tinan 9 TNI husik hela TL mak iha loron sexta (22/11) Hotel Borobudur Jakarta sai testamunya ba kaer liman ho tiru malu lian midar entre Lere no Prabowo.

“Uluk iha tinan 1987,1988 no 1989 nia laran ami se kanu kilat hodi tiru malu besik Viqueque ninian maibe ohin ami tiru malu ho lia fuan,” Lere hateten ba Jornal ne’e iha Jakarta.

“Loron ida ne’e (Sexta 22/11) hanesan loron importante ba ami sira ne’ebe uluk se kilat tutun ba malu tan nu’udar gerileiru duranti tinan 24 ami kuandu dame ho ema ne’e ho laran no fuan,” nia hahi.

Enkontru Prabowo ho Lere ba dala uluk ne’e hanesan enkontru privadu maske marka prezenca iha andar 19 ne’e marka prezenca mos husi Sekretariu estadu Julio Tomas Pinto, Tenente Koronel Falur, Tanente Koronel Koliati, koandanti PM F-FDTL, Presidenti PMD Kupa no komitiba Prabowo ninian ne’e halao nakonu ho amizade, hamnasa ho relex. Autores istoria funu nian rua ne’e relembra hikas sira nia lalaok iha era funu no aceita malu atu haluha pasadu hodi hit ain lao ba futuru kmanek povu no nasaun rua ninian.

Lere haktuir katak iha momentu ida hafoin tiru malu tiha mosu iha preokupasaun bo’ot teb-tebes iha parte gerileirus sira nian kuandu rona rumores katak prabowo hetan tiru no kanek iha kombate ne’ebe nia maka dirije rasik. “Iha momentu ne’eba ami hanoin karik Pak Prabowo mak kanek duni entaun Timor Leste bele ran sulin maka’as tan ba Pak Prabowo ne’e mane foun Presidenti Soeharto nian.”

“Uluk ami tiru malu ho kilat musan maibe agora ami tiru malu ho lia fuan,” Koronel Lere haklaken.

“Momentu ne’eba ne’ene bapa Prabowo ninia biru forte no ha’u nia mos forte ne’e maka la kona,” dehan Lere ne’ebe simu ho hamnasa.

Ho mos hamnasa lian a’as no liman hatudu ba nia kapas ne’ebe bala semo liu, Prabowo informa, “maibe iha momentu ne’eba ha’u besik atu kona (tiru).”

“Ami uluk duni tuir beibeik sr. Lere maibe nia sempre eskapa husi kapturasaun,” nia hatutan. Lere ne’ebe tur iha liman karuk Prabowo simu ho hamnasa.

“Ha’u respeitu ba Falintil no ha’u respeita komanadante Lere.”

Eis Komandante baret mean ne’e hateten “Uluk nu’udar soldadus ne’ebe konfronta malu no nu’udar parte mak kontra malu maibe durante de kontra malu ne’eba hanesan soldadu ita sempre respeita no nafatin tau respek bo’ot ba inimigu sira ne’ebe iha brani no inimigu mak forte.”

Nune’e duni Eis Jeneral fitun tolu ne’e rekuinese mos Falintil ninia determinasaun ba luta ukun rasik an nasaun timor Leste. “Hanesan soldadu iha tempu ne’eba ita konfronta malu maibe ha’u nu’udar soldadu, nu’udar Militar, nu’udar officiais no nu’udar komandante ba soldadus sira maibe Durante funu malu ne’e ha’u sempre respeita nafatin ba komandantes falintil sira ho sira nia soldadus ne’ebe brani mos forte iha sira nia pozisaun.”

Tuir Prabowo katak buat hotu ne’ebe mosu iha pasadu, “ne’e obrigatoriu husi istoria maibe iha ha’u nia fuan nu’udar militar ida ha’u respeita no impresionadu ho Falintil.”

Ho doko ulun sinal aceita nia realsa,

“Nu’udar soldadus iha momentu ne’eba ita ida-idak halao ita nia responsabilidade ba estadu.”

No comments: